Good Vibes News in Angel Pastor.
Na-mimiss ang mga estudyante!
KINAALIWAN ang isang guro mula sa Cebu na nakaisip ng ideya para kahit papaano ay maibsan ang pagka-miss sa kanyang mga estudyante.
Nakaramdam umano ng kalungkutan habang nasa loob ng silid si teacher Pinky Donire, habang gumagawa ng module.
Kaya naman naisipan nito na mag-print ng mga life-size picture ng kaniyang mga estudyante at saka ito idinikit sa kani-kanilang upuan.
Ito umano ay para maramdaman pa rin niya na present ang mga bata kahit nasa modular distancing learning na.
Labis na kinaaliwan naman ng mga netizen ang naisip ng guro.
Pabirthday ng “new normal”
KUNG dati rati ay nakagawian na nating mga Pinoy ang magdiwang ng kaawaran, may handaan, kainan kasama at pamilya at kamag-anak.
Ngunit tila ngayon ay tuluyan na itong binago ng pandemya, dahil imbes na magkaroon ng mga handa o children’s party para sa ikaapat na kaarawan ng anak, naisipan ng isang ina na turuan ng mabuting asal at pagtulong sa kapwa ang kanyang anak.
Habang nakasuot kasi ng red ranger costume ang batang si JK, sila ay namahagi ng groceries sa mga kapus-palad na mga Pinoy sa daan.
Kahit anila, naging mahirap ang panahon dahil sa pandemya ay nakatanggap pa rin sila ng biyaya na nararapat lamang na ibahagi sa iba.
Tuwang-tuwa naman ang apat na taong gulang na bata dahil kahit walang party, naranasan naman niya ang maging real life superhero at makatulong sa kapwa.
Philippine banknotes, binigyang buhay ng isang Filipino artist
ISANG Filipino artist ang nag-viral sa social media matapos ang kanyang recreated digital artworks sa mga perang papel ng Pilipinas.
Kinilala ang artist na si Adlai Jawid ng Kulay Colorization, kung saan mas binigyang buhay pa nito ang harap na bahagi ng bawat perang papel na nagtatampok ng mga prominenteng tao ng bansa, habang ang kabilang bahagi ay naglalarawan ng mga landmark at hayop.
Kasama na rito ang colorization, photo manipulation at ilang overlays sa kanyang artworks.
Matatandaan, ang mga perang papel ng Pilipinas ay sumailalim sa massive redesign noong 2009 na may enhanced security features at ang pagpapahusay ng durability nito.
Sumailalim din ito sa mga pagbabago noong 2017, 2019, at 2020 kasama na dito ang windowed security thread para sa ₱100, ₱200, ₱500, ₱1000 banknotes na may mga indigenous weaving patterns.
Isang bata, nanonood ng educational program sa isang wifi kiosk
KINABILIBAN ang isang batang lalaki na nanood ng educational programs at cartoons sa isang wifi kiosk sa smart station sa España Blvd., Manila.
Sa Facebook post ni Marc Joseph Austria, nakakatuwa aniyang makita ang bata na nakagawa ng paraan para libangin ang sarili.
Saad pa ni Austria, may suot-suot pang earphone ang bata para mapakinggan ang pinapanood.
Turan ng netizens na dapat ay makapag-install ng outdoor o public monitors sa mga istasyon ng mga MRT at LRT para sa mga batang gustong mag-aral pero walang TV upang makapanood ng DepEd channels.
Umani naman ng papuri ang pagsusumikap na ito ng bata.